ထားဝယ် အောက်တိုဘာ ၇
တနင်္သာရီတိုင်းဒေသကြီးအစိုးရအဖွဲ့ဝန်ကြီးချုပ်ဦးမြတ်ကို နှင့် ဌာနဆိုင်ရာတာဝန်ရှိသူများသည်ယနေ့နံနက်ပိုင်း တွင် ထားဝယ်ပြည်သူ့ဆေးရုံကြီးရှိအောက်ဆီဂျင်ထုတ်စက်နှင့် ကုသဆောင်များအား ကြည့်ရှု့စစ်ဆေးခဲ့ ကြောင်းသိရသည်။
ပြည်သူ့ဆေးရုံကြီး၌တက်ရောက်ကုသနေသော ကိုဗစ်-၁၉ရောဂါဓာတ်ခွဲအတည်ပြုပိုးတွေ့လူနာများအားကုသရေး လုပ်ငန်းများဆောင်ရွက်ပေးရာတွင် အောက်ဆီဂျင်အိုး လိုအပ်ချက်များကို တစ်ဖက်တစ်လမ်းမှအထောက်အကူပြုနိုင်ရန် အတွက်ရည်ရွယ်၍အလှူရှင်မိသားစု က လှူဒါန်းသည့် အောက်ဆီဂျင်ထုတ်စက်(၂)လုံးအား တိုင်းဒေသကြီးအစိုးရအဖွဲ့ ဝန်ကြီးချုပ်ဦးမြတ်ကို က ကြည့်ရှု့စစ်ဆေးပြီး လိုအပ်သည်များလမ်းညွှန်မှာကြားခဲ့သည်။
အဆိုပါအောက်ဆီဂျင်ထုတ်စက်(၂)လုံးမှာရန်ကုန်မြို့နေ ထားဝယ်ဖွံ့ဖြိုးတိုးတက်မှုအများပိုင်ကုမ္ပဏီလီမီတက် ဥက္ကဌဦးခင်စိုး ၊ ဒေါ်အုန်းဇာဇာလွင်အဏ္ဏဝါလွှမ်းကုမ္ပဏီမိသားစု(ရန်ကုန်) တန်ဖိုးငွေကျပ်သိန်း(၈၀၀) နှင့် ဝိသာခါ ဖောင်ဒေးရှင်းမှဦးဆောင်၍ရဟန်းရှင်လူပြည်သူများနှင့်အတူစုပေါင်းလှူဒါန်းသည့်‘‘ စုပေါင်းအလှူကျန်းမာအကူ’’အစီအစဉ် မှကျပ်သိန်း ၁၄၀၀ တန်ဖိုးရှိ အောက်ဆီဂျင် ၅၀ Liter /min ဖြင့် ထုတ်လွှတ်ပေးနိုင်သော Oxygen Plant တို့ဖြစ်ပြီး တစ်နာရီ လျှင် ၄၀ လီတာဆံ့အိုး ၄ လုံး ထုတ်လုပ်နိုင်ကြောင်းသိရသည်။
ထိုနောက် တိုင်းဒေသကြီးအစိုးရအဖွဲ့ ဝန်ကြီးချုပ်ဦးမြတ်ကို က ကျောက်ကပ်ဆေးကုသမည့်လူနာများအတွက် အဆောက်အဦ ထားရှိမည့်မြေနေရာအားလည်းကောင်း၊သီးသန့်ကုသဆောင်နေရာတွင် (၆)ကုတင်ဆံ့ ကိုဗစ် လူနာများ အတွက်အထူးကြပ်မတ်ကုသမည့်နေရာအားလည်းကောင်း၊ ခွဲစိတ်ကုသဆောင်ရှိရိုးရိုးလူနာအထူးကြပ်မတ်ကုသမည့်နေရာ အားလည်းကောင်း၊ကိုဗစ်ပိုးရှိမရှိစစ်ဆေးနိုင်မည့် RT-PCR စက်ထားရှိမည့် Dawei Hospital Biosafety Laboratary အသစ် တည်ဆောက်နေသောအဆောက်အဦ အားလည်းကောင်း ကြည့်ရှု့စစ်ဆေးပြီးလိုအပ်သည်များကိုသက်ဆိုင်ရာ တာဝန်ရှိသူများနှင့်ပေါင်းစပ်ညှိနှိုင်းဆောင်ရွက်ပေးခဲ့ကြောင်းသတင်းရရှိသည်။
(တိုင်းဒေသကြီးပြန်/ဆက်)