ထားဝယ် အောက်တိုဘာ 3
တနင်္သာရီတိုင်းဒေသကြီးအစိုးရအဖွဲ့ ဝန်ကြီးချုပ်ဦးမြတ်ကိုသည် အစိုးရအဖွဲ့ဝင်ဝန်ကြီးများ၊ ကမ်းရိုးတန်းဒေသ တိုင်းစစ်ဌာနချုပ် ဒုတိယတိုင်းမှူးတို့နှင့်အတူ အောက်တိုဘာလ(၂)ရက်နေ့ နံနက်၈နာရီ ၅၀မိနစ်အချိန်ကထားဝယ်မြို့နယ်၊ ဖောင်းတောကြီးကျေးရွာအုပ်စုရှိ ဖောင်းတောမီးစက်သို့ရောက်ရှိ၍ ကြည့်ရှုစစ်ဆေးခဲ့ကြောင်း သိရှိရသည်။
အဆိုပါဖောင်းတောမီးစက်သည် ဟိန္ဒားသတ္တုတွင်း လုပ်ငန်းခွင်သို့ လျှပ်စစ်ဓာတ်အားပို့လွှတ်နေသည့် မီးစက်ဖြစ် ပြီး ၁၉၃၆ခုနှစ်တွင် စတင်တည်ဆောက်၍ ၁၉၃၉ ခုနှစ်တွင် စတင်လည်ပတ်ခဲ့သော ရေအားဖြင့်လည်ပတ်သည့် တာဘိုင် လျှပ်စစ် ဓာတ်အားထုတ်စက်ဖြစ်ပြီး တာဘိုင်(၃)လုံး ရှိသည့်အနက် (၁)လုံးသာ လည်ပတ်လျက်ရှိကြောင်း သိရသည်။
အဆိုပါတာဘိုင်(၃)လုံးမှာ နှစ်ပေါင်း(၈၀)ကျော်ကြာမြင့်ခဲ့ပြီ ဖြစ်သည့်အတွက် ယခုအခြေအနေတွင် စက်(၃)လုံး စွမ်းအားပြည့်လည်ပတ်နိုင်ပါက ၁.၅ မဂ္ဂါဝပ်သာထွက်ရှိနိုင်ကြောင်းသိရှိရပြီးအဆိုပါမီးစက်အားပထမအဆင့် အဆင့်မြှင့် တင်ပြီး ပါက လျှပ်စစ်ဓာတ်အား ၁၅ မဂ္ဂါဝပ်အထိ ထွက်ရှိနိုင်သည့်အတွက် ထားဝယ်ခရိုင်(၄)မြို့နယ်အတွင်း ဈေးနှုန်း ချိုသာ စွာဖြင့် လျှပ်စစ်ဓာတ်အား လုံလောက်စွာ သုံးစွဲနိုင်မည်ဖြစ်ကြောင်းသိရှိရသည်။
ထို့နောက်တိုင်းဒေသကြီးဝန်ကြီးချုပ်ဦးမြတ်ကိုသည်နံနက်၁၀နာရီအချိန်တွင်ဖောင်းတောကြီး ကျေးရွာသို့ ရောက်ရှိ ပြီး ကျန်းမာရေးဦးစီးဌာနနှင့် လူမှုရေးအဖွဲ့အစည်းများပူးပေါင်းအဖွဲ့က ကျေးရွာနေ ပြည်သူများအား ကိုဗစ်-၁၉ရောဂါ ကာကွယ်ဆေးထိုးနှံပေးနေမှုအခြေအနေနှင့်လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန၊ ထားဝယ်မြို့နယ်ဦးစီးမှူး ရုံးမှပန်းခင်းစီမံချက်ဖြင့်အိမ်ထောင်စုလူဦးရေစာရင်းများ၊နိုင်ငံသားစိစစ်ရေးကတ်ပြားများ ဆောင်ရွက်ပေးနေမှုအခြေအနေ များကို ကြည့်ရှု့အားပေးခဲ့ကြောင်း သိရှိရပါသည်။
(တိုင်းဒေသကြီးပြန်/ဆက်)